Liverpool var liðið sem varðist

José Mourinho segir að leikur lærisveina sinna hjá Manchester United gegn Liverpool í ensku úrvalsdeildinni í fótbolta hafi verið spennandi fyrir alla sem fylgdust með en að gæðin hafi ekki verið með mesta móti.  

Manchester United náði að tryggja sér jafntefli með marki Zlatan Ibrahimovic í lokin eftir að James Milner hafði komið Liverpool yfir úr víti í fyrri hálfleik. 

„Þetta var spennandi leikur, líka fyrir þá hlutlausu. Þetta var spennandi fram að síðustu sekúndu en það voru samt ekki mikil gæði í leiknum. Við náðum ekki að sýna okkar besta leik.“

„Þeir voru sniðugir og tóku sér sinn tíma og þeir vita hvernig á að spila fótbolta og stjórna tilfinningunum sínum í leiknum.“

Mourinho segir að sitt lið hafi sótt í leiknum og að Liverpool hafi varist. 

„Við vorum liðið sem sótti í leiknum og Liverpool var liðið sem varðist. Ég naut þess að fylgjast með leiknum en það var leiðinlegt að ná ekki í þrjú stig,“ sagði Portúgalinn að lokum. 

• Blogga um frétt