Rafael Benítez, knattspyrnustjóri Newcastle, er undir smásjá tveggja kínverskra félaga sem eru reiðubúin að gera hann að launahæsta knattspyrnustjóra heims.
Talið er að boðið hljóði upp á 30 milljónir punda í árslaun, eða um 600 þúsund pund á viku, ef hann er tilbúinn til þess að fara til Kína í sumar. Það er álíka og framherjinn Carlos Tévez fær í laun þar í landi.
Þessar fjárhæðir mundu gera hann að langlaunahæsta stjóra heims. Andre Villas-Boas fær 11 milljónir punda á ári hjá liði Shanghai SIPG og Sven Göran Eriksson fær 4 milljónir punda á ári hjá Shenzhen, sem leikur í kínversku B-deildinni.
Benítez hefur stýrt Newcastle í um ár, en hann náði ekki að forða liðinu frá falli úr ensku úrvalsdeildinni í fyrra. Hann er hins vegar með liðið í öðru sæti B-deildarinnar og fátt virðist geta komið í veg fyrir að liðið fari upp. Benítez gerði Liverpool meðal annars að Evrópumeisturum árið 2005.