Sir Alex Ferguson fyrrverandi knattspyrnustjóri Manchester United segir að José Mourinho sé óheppinn að lið hans sé ekki að berjast um Englandsmeistaratitilinn.
United er í fimmta sæti deildarinnar eftir 27 leiki á fyrsta tímabilinu undir stjórn Mourinho og er 17 stigum á eftir forystusauðunum í Chelsea, sem að öllu óbreyttu landar titlinum í vor.
„Ég tel að José hafi staðið sig mjög vel en hann hefur verið óheppinn. Það hafa verið heimaleikir á þessu tímabili sem hafa verið alveg frábærir en hafa endað með jafntefli. Ef liðið hefði unnið þessa leiki þá væri engin spurning um það að liðið væri í titilbaráttunni,“ segir Ferguson, sem 13 sinnum gerði Manchester United að Englandsmeisturum.
Manchester United á tvo heimaleiki í röð. Liðið fær WBA í heimsókn á sunnudaginn og á þriðjudaginn tekur liðið á móti Everton.