Wayne Rooney, fyrirliði Manchester United, hefur átt erfitt uppdráttar á þessu tímabili, bæði með félagsliði sínu sem og enska landsliðinu.
Bresku blöðin greina frá því í dag Rooney ku vera búinn að tjá liðsfélögum sínum að hann muni ekki leika með Manchester United á næstu leiktíð. Rooney er ósáttur við stöðu sína hjá Manchester-liðinu en hann hefur aðeins verið í byrjunarliðinu í níu deildarleikjum á tímabilinu.
Síðasti leikur Rooney með United verður í júní þegar hann tekur þátt í ágóðaleik fyrir Michael Carrick en Rooney hafði vonast til að segja skilið við Manchester-liðið á betri nótum.
Rooney hefur ekki verið með í síðustu leikjum vegna meiðsla á ökkla en þessi 31 árs gamli sóknarmaður kom til Manchester United frá Everton árið 2004 og náði á síðasta ári að skrá nafn sitt í sögubækur félagsins með því að slá markamet Sir Bobby Charlton.
Rooney hafnaði tilboði í janúar um að fara til Kína en talið er líklegt að Bandaríkin verði hans næsti áfangastaður eða hann fari til uppeldisfélagsins síns, Everton.