Schumacher ekur leigubíl

Michael Schumacher settist undir stýrið á leigubíl á leið sinni út á flugvöll og greiddi leigubílstjóranum vel útilátið þjórfé fyrir að setjast í farþegasætið. Fyrrum heimsmeistarinn í kappakstri var of seinn í flug og tók því við akstrinum.

Reuters fréttastofan hefur eftir þýska dagblaðinu Münchner Abendzeitung að Schumacher hafi verið í fríi í þorpinu Gehuelz nærri Coburg með fjölskyldunni.

„Það var brjálað að sitja sjálfur í farþegasætinu með Schumi undir stýri,” sagði leigubílstjórinn í viðtali. Hann mun hafa fengið 100 evrur í þjórfé ofan á 60 evru fargjaldið.