Sebastian Vettel hjá Ferrari færist aftur um fimm sæti á rásmarki austurríska kappakstursins í Spielberg á morgun.
Ákvarðast endanlegt sæti Vettels af því hvar hann hafnar í tímatökunni í dag. Ástæða afturfærslunnar er að hann neyddist til að fá nýjan gírkassa í bílinn eftir æfingarnar í gær.
Ferrari varð að grípa til sömu ráðstafana í rússneska kappakstrinum fyrr í sumar. Samkvæmt reglum verða ökumenn að brúka einn og sama gírkassann sex mót í röð, nema því aðeins að þeir hafi fallið úr keppni í næsta móti fyrir gírkassaskiptin.
Vettel varð fjórði á seinni æfingunni í Spielberg í gær og í þriðja sæti á þeirri fyrri.