Paolo Maldini, sem í gær tók við heimsbikar félagsliða sem fyrirliði AC Milan, tilkynnti eftir sigurinn í úrslitaleiknum gegn Boca Juniors, 4:2, að hann myndi leggja knattspyrnuskóna á hilluna í vor.
Maldini er 39 ára gamall og á langan og glæsilegan feril að baki. Hann hefur leikið með AC Milan samfleytt frá 16 ára aldri, eða í 23 ár, og lék 126 landsleiki fyrir hönd Ítalíu. Deildaleikirnir með AC Milan eru á sjöunda hundrað. Hann hefur unnið fimm Evróputitla með félaginu, sjö ítalska meistaratitla, fjóra "stórbikara Evrópu" og nú heimsbikarinn.
„Ég er svo sannarlega ánægður með uppskeruna á mínum ferli og í júní mun ég leggja skóna á hilluna, mjög sáttur. Það er frábært að hafa bætt þessum titli við, 39 ára gamall, með frábæru félagi eins og AC Milan. Ég hef upplifað allt á mínum ferli en nú eru sársaukinn og barningurinn tekin við. Þetta er ennþá gaman en ég finn víða til og þetta er að verða gott," sagði Maldini.