Ragnar Sigurðsson og samherjar í rússneska liðinu Krasnodar gerðu í kvöld jafntefli, 1:1, við Lille frá Frakklandi á heimavelli í riðlakeppni Evrópudeildar UEFA og eiga þar með ekki lengur möguleika á að komast áfram í 32ja liða úrslit keppninnar.
Ari kom Krasnodar yfir á 35. mínútu og gaf Rússunum von um að vera enn með í baráttunni. Hún varð að engu þegar Nolan Roux jafnaði fyrir Frakkana á 79. mínútu leiksins.
Krasnodar er því enn án sigurs í riðlinum en er með 3 stig eftir þrjú jafntefli og tvo ósigra. Ragnar lék allan leikinn í vörn rússneska liðsins.
Everton er með 8 stig, Wolfsburg 7 og Lille 4 stig. Fyrri hálfleik er lokið hjá Wolfsburg og Everton og þar er enska liðið með 1:0 forystu eftir mark frá Romelu Lukaku. Ef það verður niðurstaðan verður viðureign Lille og Wolfsburg í lokaumferðinni hreinn úrsitaleikur um hvort liðið kemst áfram með Everton.
Úrslitin í Rússlandi þýða að Everton fer áfram, sama hvernig leikurinn við Wolfsburg endar.
Ragnar og félagar eiga eftir að heimsækja Everton á Goodison Park í Liverpool en liðin mætast þar 11. desember.