Aron Jóhannsson hefur dregið sig úr landsliðshópi Bandaríkjanna vegna meiðsla á tá að sögn Dougs McIntyres, fréttamanns á ESPN. Aron kemur því til með að missa af leik Bandaríkjanna gegn Sviss. Jordan Morris tekur sæti Arons í hópnum en hann er leikmaður í U23-ára liði Bandaríkjamanna.
Aron skoraði eitt mark í 3:2-tapi gegn Danmörku í vináttuleik á miðvikudaginn en leikurinn fór fram á gamla heimavellinum hans í Árósum. Þetta var fyrsti landsleikur Arons frá því á heimsmeistaramótinu í Brasilíu í fyrra en eftir mótið gekkst hann undir aðgerð vegna meiðsla.