Skömmu áður en viðureign Rauðu stjörnunnar frá Belgrad og Kairat Almaty frá Kasakstan í forkeppni Evrópudeildar UEFA í knattspyrnu hófst í serbnesku höfuðborginni í gærkvöld fannst handsprengja á leikvanginum.
Hún lá á þaki einnar stúkunnar og samkvæmt fréttum var hún ryðguð. Samkvæmt upplýsingum frá serbneska innanríkisráðuneytinu var sprengjan fjarlægð og henni eytt og lögregla rannsakar hvernig hún komst á þennan stað.
Ekki þurfti að fresta leiknum en fyrrverandi Evrópumeistarar Rauðu stjörnunnar eru með bakið upp við vegg því þeir töpuðu 0:2 fyrir Kasökkunum.