Thomas Tuchel, knattspyrnustjóri þýska liðsins Dortmund, er gríðarlega vonsvikinn vegna þess að varnarmaðurinn Mats Hummels vill ganga til liðs við Bayern München.
Dortmund á ennþá möguleika á því að verða þýskur meistari í knattspyrnu en vonin er veik. Bayern er sjö stigum á undan Dortmund og tryggir sér titilinn takist liðinu að sigra Borussia Moenchengladbach á morgun. Dortmund og Bayern mætast síðan í úrslitaleik þýsku bikarkeppninnar 21. maí.
„Við fréttum af þessu í gær. Mats (Hummels) sagði okkur frá ákvörðun sinni í gær og ég er ánægður að staðan er skýr. Við getum þá unnið út frá því,“ sagði Tuchel en Bayern á eftir að gera Dortmund tilboð í Hummels.
„Við myndum missa gæðaleikmann og ákvörðunin eru okkur auðvitað mikil vonbrigði,“ bætti Tuchel við en Hummels gekk til liðs við Dortmund frá Bayern München árið 2008 og snýr því aftur á heimaslóðir fái hann vilja sínum framgengt.