Sverrir Ingi Ingason, landsliðsmiðvörður í knattspyrnu, kom í gær til spænska félagsins Granada, sem kaupir hann af Lokeren í Belgíu. Samkvæmt heimildum Morgunblaðsins er kaupverðið um 1,9 milljón evra, eða um 230 milljónir íslenskra króna.
Ekki var gengið endanlega frá samningum í gærkvöld, en Sverrir fór þá í læknisskoðun hjá Granada. Að óbreyttu verður skrifað undir í dag og Sverrir gæti spilað strax gegn Espanyol í Barcelona á laugardaginn kemur.
Sverrir er á leið í mjög erfiða fallbaráttu með liði Granada sem er næstneðst í deildinni með aðeins einn sigur í fyrstu átján leikjunum og er sex stigum frá því að komast úr fallsæti.
Þetta er sjötta tímabil Granada í röð í 1. deildinni, en liðið hefur ávallt endað í 15. til 17. sæti af 20 liðum og yfirleitt forðað sér naumlega frá falli. Félagið sneri aftur í efstu deild 2011 eftir 35 ára fjarveru og það spilaði um skeið í D-deild, á árunum 2002 til 2006, en vann sig síðan hratt upp eftir það.
Sjá nánar í íþróttablaði Morgunblaðsins í dag.