Landsliðsmaðurinn Ragnar Sigurðsson hefur yfirgefið herbúðir enska B-deildarliðsins Fulham eftir eins árs veru og hefur verið lánaður til Rubin Kazan í Rússlandi. Hann mun leika í treyju númer 5 hjá liðinu.
Miðillinn 433.is greindi fyrst frá þessu fyrir skemmstu. Ragnar kom til Fulham eftir Evrópumótið í Frakklandi í fyrra frá Krasnodar í Rússlandi, og heldur því aftur til landsins.
Ragnar verður ekki eini Íslendingurinn í rússnesku úrvalsdeildinni í vetur því Sverrir Ingi Ingason gekk í raðir FC Rostov í sumar.
Eftir þrjár umferðir í rússnesku deildinni er Rubin Kazan með þrjú stig en liðið mætir CSKA Moskva á útivelli í fjórðu umferðinni á sunnudaginn. Liðið endaði í 9. sæti af 16 liðum í deildinni á síðasta tímabili en varð rússneskur meistari árin 2008 og 2009.
Liðið er frá borginni Kazan sem er rúmlega 700 kílómetra austur af Moskvu.
Welcome Ragnar! The Icelandic defender joins from Fulham on a 1 year loan. pic.twitter.com/AQQg4bhvfS
— Rubin Kazan UK (@RubinKazanUK) August 3, 2017