Roberto Mancini hefur útilokað að taka við þjálfun ítalska landsliðsins í knattspyrnu en ítalska knattspyrnusambandið rak í vikunni hinn 69 ára gamla Giampiero Ventura úr starfi eftir að Ítalir náðu ekki að vinna sér sæti á HM og verða ekki með á HM í fyrsta sinn í 60 ár.
„Ég er ekki hissa á að ég sé nefndur til sögunnar en ég er ánægður hjá Zenit og er ekki að hugsa um ítalska landsliðið,“ sagði Mancini við fréttamenn en hann tók við þjálfun Zenit Petersburg á þessu ári. Sjálfur lék Mancini 36 leiki með ítalska landsliðinu og skoraði í þeim fjögur mörk.
„Eins og marga aðra landa mína dreymdi mig um að sjá ítalska landsliðið á HM í Rússlandi en sjá það falla úr leik var virkilega sárt,“ sagði Mancini en Carlo Ancelotti þykir nú líklegastur til að taka við þjálfun ítalska landsliðsins.