Albert Guðmundsson var enn og aftur á skotskónum með unglingaliði PSV í hollensku B-deildinni í knattspyrnu í kvöld.
Albert skoraði síðara mark PSV í 2:0 sigri gegn Utrecht og var þetta 18. mark hans í síðustu 18 leikjum með liðinu en Albert leikur í stöðu kantmanns.
Albert hefur verið í hópnum með aðalliði PSV í flestum leikjum þess í hollensku úrvalsdeildinni á tímabilinu og hefur komið við sögu í þremur þeirra en PSV er með átta stiga forskot á Ajax í toppsæti deildarinnar.