Aron íþróttamaður ársins 2012

Aron Pálmarsson, landsliðsmaður í handknattleik og leikmaður Evrópu- og Þýskalandsmeistara Kiel, var kjörinn íþróttamaður ársins 2012 af Samtökum íþróttafréttamanna, en kjörinu var lýst fyrir stundu í 100 ára afmælishófi Íþrótta- og Ólympíusambands Íslands í Gullhömrum í Grafarholti.

Kvennalandslið Íslands í fimleikum var útnefnt lið ársins 2012 og Alfreð Gíslason hjá Kiel var valinn þjálfari ársins 2012 en Samtök íþróttafréttamanna veittu þau verðlaun í fyrsta skipti í kvöld.

Aron hlaut yfirburðarkosningu. Hann fékk 425 stig af 460 mögulegum. Ásdís Hjálmsdóttir, Íslandsmethafi í spjótkasti kvenna úr Ármanni, hafnaði í öðru sæti og sundmaðurinn Jón Margeir Sverrisson hafnaði í þriðja sæti. Lítill munur var á milli Ásdísar og Jóns Margeirs. Ásdís varð einnig í öðru sæti í kjörinu fyrir ári.

Þetta er í fyrsta sinn sem Aron verður efstur í kjöri á íþróttamanni ársins hjá Samtökum íþróttafréttamanna.  Hann er um leið níundi handknattleiksmaðurinn sem hreppir nafnbótina í 57 ára sögu kjörsins.  Handknattleiksmenn hafa unnið nafnbótina í tólf skipti.

Alls hlutu 20 íþróttamenn stig í kjörinu að þessu sinni.

1. Aron Pálmarsson                       handbolti                  425 stig

2. Ásdís Hjálmsdóttir                   frjálsíþróttir              279 stig

3. Jón Margeir Sverrisson             íþróttir fatlaðra         267 stig

4. Gylfi Sigurðsson                       fótbolti                     149 stig

5. Þóra B. Helgadóttir                  fótbolti                     122 stig

6. Auðunn Jónsson                       kraftlyftingar            74 stig

7. Alfreð Finnbogason                  fótbolti                     65 stig

8. Ásgeir Sigurgeirsson                 skotfimi                    61 stig

9. Íris Mist Magnúsdóttir              fimleikar                   58 stig

10. Kári Steinn Karlsson                 frjálsíþróttir              55 stig

11. Guðjón Valur Sigurðsson         handbolti                  51 stig

12. Ragna Ingólfsdóttir                  badminton                27 stig

13. Jón Arnór Stefánsson               körfubolti                 25 stig

14. Aðalheiður Rósa Harðardóttir  karate                       7 stig

15.-17. Guðný Jenný Ásmundsdóttir   handbolti                  3 stig

15.-17.  Sarah Blake Bateman               sund                         3 stig

15.-17.  Alexander Petersson                 handbolti                  3 stig

18.-19. Helena Sverrisdóttir                  körfubolti                 2 stig

18.-19. Ólafur Stefánsson                     handbolti                  2 stig

20. Aníta Hinriksdóttir                   frjálsíþróttir              1 stig

Aron lék stórt hlutverk hjá Kiel sem varð þýskur meistari í vor með fullu húsi stig, liðið varð einnig þýskur bikarmeistari og Evrópumeistari. Aron lék afar vel með íslenska landsliðinu á árinu, ekki síst á Ólympíuleikunum þar sem hann var valinn í úrvalslið leikanna en íslenska landsliðið hafnaði í 5. sæti.

• 1 blogg um fréttina

Bloggað um fréttina

• Ómar Ragnarsson: Tímabærar nýjungar.