Serbinn Novak Djokovic sigraði Bretann Andy Murray í úrslitaleik Opna ástalska mótsins í tennis nú fyrir stundu. Sigur Djokovic var öruggur en hann vann 3:0 í lotum talið (6:1 7:5 7:6).
Djokovic, sem er efstur á heimslistanum í tennis, hefur þar með unnið Opna ástralska mótið sex sinnum. Samtals hefur hann nú unnið ellefu risamót á ferlinum, þar af stóð hann uppi sem sigurvegari á þremur af fjórum risamótum ársins í fyrra.
Murray tapaði hins vegar í fimmta skipti í úrslitum Opna ástralska mótsins en hann hefur aldrei náð í gullmedalíu þar.
„Mér finnst eins og þetta hafi gerst áður,“ sagði Murray glottandi eftir úrslitaleikinn. „Ég vil óska Novak (Djokovic) innilega til hamingju með sigurinn. Það er ótrúlegt að vinna þetta mót sex sinnum og síðasta ár hefur verið magnað hjá honum.“