Heldur að Gunnar Nelson sé Íri

Gunnar Nelson berst við Bandaríkjamanninn Alan Jouban í UFC í London 18. mars næstkomandi. 

Jouban er búinn að vinna síðustu þrjá bardaga sína í UFC, en Gunnar er fyrsti andstæðingur hans sem er á topp 10 á heimslistanum. Þrátt fyrir það er Jouban mjög kokhraustur fyrir bardagann. 

„Gunnar er góður bardagamaður en ég ætla að vinna hann því ég hef allt sem til þarf. Ég hef hugarfarið, er í góðu formi og ég er einbeittur og ætla að sýna hvað ég get. Ég ætla að klára Gunnar Nelson og þá get ég komist í titilbaráttuna.“

Spyrillinn spurði Jouban svo hvernig það væri að keppa í London, þar sem Gunnar ætti að fá mikinn stuðning aðdáanda þar sem hann er Íri. Jouban leiðrétti hann ekki, heldur virtist hann ekki hafa hugmynd um að Gunnar væri í raun íslenskur. 

„Fyrir mér er London heimavöllur þar sem umboðsmaðurinn minn er búsettur þar. Gunnar mun pottþétt hafa fjölskylduna sína þar, sitt fólk og sína stuðningsmenn,“ sagði Jouban. 

• Blogga um frétt