Tveir Bretar á leið í Mosfellsbæinn

Tveir breskir handknattleiksmenn koma til liðs við úrvalsdeildarlið Aftureldingar fyrir næstu leiktíð. Um er að ræða línumanninn Chris McDermott og vinstri hornamanninn Mark Hawkins sem leikið hefur með neðrideildarliði í Danmörku síðustu ár.

„Við erum ekki að kosta neinu til með því að fá þá til okkar,“ sagði Gunnar Andrésson, þjálfari Aftureldingar í gær. „Mér barst fyrirspyrn frá Dana sem ég þekki og þjálfar breska landsliðið fyrir Ólympíuleikana hvort við vildum aðstoða hann og eftir að hafa farið yfir málið þá slógum við til. Ef leikmennirnir geta aukið breiddina í hópnum hjá okkur þá er það fínt,“ sagði Gunnar. iben@mbl.is