Sigurður Örn Þorsteinsson var hetja Fram-liðsins þegar hann tryggði því sigur á Stjörnunni, 23:22, í með því að skora á síðustu sekúndu leiks liðanna í TM-höllinni í Garðabæ í kvöld. Þar með lyfti Fram sér upp um tvö sæti í deildinni, af botninum og upp í áttunda sæti með fjögur stig. Stjarnan er fyrir neðan með þrjú stig og HK rekur lestina með tvö stig.
Fyrri hálfleikur var nokkuð jafn en frumkvæðið var heldur í höndum Fram-liðsins sem var með tveggja marka forskot, 12:10, þegar gengið var til búningsherbergja í hálfleik.
Fram náði mesta fjögurra marka forskoti, 20:16, í síðari hálfleik en Stjörnumenn gáfust ekki upp. Þeir söxuðu á forystu Framara á lokasprettinum svo úr varð æsilegur lokakafli þar sem Fram hafði naumlega betur.
Ólafur Jóhann Magnússon, leikmaður Fram, fékk rauða spjaldið í stöðunni 20:16, en þá voru níu mínútur eftir. Þar sem um beint rautt spjald er að ræða má reikna með að hann verði úrskurðaður í leikbann.
Kristinn Björgúlfsson lék sinn fyrsta leik með Fram eftir að hafa skipt í gær frá ÍR. Hann kom með reynslu inn í liðið sem reyndist dýrmæt. Auk þess skoraði hann fimm mörk.
Mörk Stjörnunnar: Andri Hjartar Grétarsson 6, Þórir Ólafsson 6, Sverrir Eyjólfsson 3, Ari Magnús Þorgeirsson 2, Starri Friðriksson 2, Egill Magnússon 1, Gunnar Harðarson 1, Hrannar Bragi Eyjólfsson 1.
Mörk Fram: Sigurður Örn Þorsteinsson 6, Kristinn Björgúlfsson 5, Garðar B. Sigurjónsson 4, Stefán Baldvin Stefánsson 3, Stefán Darri Þórsson 3, Arnar Freyr Ársælsson 1, Ólafur Jóhann Magnússon 1.