Anna Úrsúla Guðmundsdóttir og Finnur Ingi Stefánsson hafa bæði skrifað undir tveggja ára samning við Handknattleiksdeild Gróttu. Anna Úrsúla semur við Gróttu á ný en Finnur Ingi gengur til liðs við Gróttu frá Val.
Anna Úrsúla var í lykilhlutverki í liði Gróttu sem varð Íslandsmeistari, deildarmeistari og bikarmeistari í vor. Línumaðurinn var valinn besti varnarmaður Olís-deildarinnar í fyrra og var valin í úrvalslið deildarinnar. Anna Úrsúla fær enn stærra hlutverk hjá Gróttu á komandi árum en hún verður spilandi aðstoðarþjálfari fyrir Gróttu.
Finnur Ingi hefur verið í lykilhlutverki með Val undanfarin ár. Hann skoraði 75 mörk á seinustu leiktíð þegar Valur varð deildarmeistari. Hornamaðurinn er uppalinn Gróttumaður og var valinn Íþróttamaður Gróttu árið 2008. Finnur lék síðast með Gróttu í efstu deild tímabilið 2009-2010. Hann verður mikill liðsstyrkur fyrir Gróttu sem verður nýliði í Olís-deildinni á næsta tímabili.