Vignir Svavarsson og félagar í Midtylland skelltu toppliði dönsku úrvalsdeildarinnar, Team Tvis Holstebro í undanúrslitum dönsku bikarkeppninnar í handknattleik í dag og leika til úrslita í keppninni á morgun. Midtylland skoraði fjögur síðustu mörk leiksins og vann, 27:25, eftir að hafa verið þremur mörkum undir í hálfleik, 13:10.
Vignir skoraði eitt mark í leiknum og gamli félagi hans úr Haukum, Sigurbergur Sveinsson, skoraði í tvígang fyrir Team Tvis Holstebro.
Úrslitaleikurinn hefst klukkan 15 á morgun og geta þeir sem hafa aðgang að TV2 í Danmörku séð leikinn.
Midtylland mætir GOG í úrslitaleik á morgun. GOG vann Århus Håndbold, 25:23, í hinni viðureign undanúrslitanna í dag. Sigvaldi Guðjónsson var markahæsti leikmaður Árósaliðsins og skoraði 6 mörk.