„Ég er fyrst og fremst mjög ánægður. Við unnum dýrasta lið heims og besta þjálfara heims,” sagði Talant Dujshebaev, þjálfari pólska meistaraliðsins Kielce, eftir að lið hans vann PSG, 28:26, í undanúrslitaleik Meistaradeildar Evrópu í handknattleik karla í Lanxess-Arena í Köln í dag.
“Á morgun rennur upp hátíðisdagur fyrir Pólverja þegar við leikum í fyrsta sinn í úrslitum Meistaradeildarinnar. Fyrst og fremst er ég í sjöunda himni með mína menn sem börðust frá upphafi til enda. Nú kemur að því búa okkur undir úrslitaleikinn á morgun,” sagði Dujshebaev á fundi með blaðamönnum eftir sigurleikinn.
Kielce hefur í þrígang komist í úrslitahelgi Meistaradeildarinnar en leikur nú í fyrsta sinn til úrslita. Liðið hafnaði í þriðja sæti 2013, þegar Þórir Ólafsson lék með því, og aftur varð liðið í þriðja sæti fyrir ári.