Þrjú íslensk handknattleikslið voru í pottinum þegar dregið var í fyrstu umferðir Evrópukeppnanna á komandi tímabili.
Karlalið Vals leikur í Áskorendabikarnum og mætir norska liðinu Haslum. Haslum varð deildarmeistari árið 2014 en varð í 2. sæti á síðasta tímabili.
Haukar senda bæði karla- og kvennalið sín til leiks. Karlaliðið leikur í EHF-bikarnum og mætir gríska liðinu A.C. Diomidis Argous. Sigurvegarinn í þeirri viðureign mætir sænska liðinu Alingsås.
Kvennalið Hauka spilar í Áskorendabikarnum og sat hjá í fyrstu umferð þar sem liðið var í efri styrkleikaflokki. Liðið mætir ítalska liðinu Jomi Salerno.
Hvorki Íslandsmeistarar Gróttu né bikarmeistarar Stjörnunnar senda lið á Evrópumót kvenna í vetur.