ÍBV vann nauman sigur á Selfossi í Olís-deild kvenna í handbolta í dag þegar liði mættust í Vallaskóla á Selfossi. Lokatölur urðu 32:31 fyrir ÍBV en Selfoss leiddi með fimm mörkum þegar tíu mínútur voru eftir.
Leikurinn var jafn fyrstu tíu mínúturnar en um miðjan hálfleikinn tóku Selfyssingar af skarið og breyttu stöðunni úr 6:6 í 11:6 á átta mínútna kafla. Selfossliðið spilaði frábæra vörn í fyrri hálfleiknum og náði mest sex marka forskoti, 15:9. Staðan var 19:14 í hálfleik.
Selfoss hafði góð tök á leiknum lengst af seinni hálfleik. Markverðir liðanna voru í aðalhlutverki en Erla Rós Sigmarsdóttir í marki ÍBV og Katrín Ósk Magnúsdóttir í marki Selfoss áttu báðar góðan leik og skelltu í lás á köflum.
Það var í raun og veru ekkert sem benti til þess að ÍBV myndi svara fyrir sig í þessum leik og þess vegna var kjaftshöggið mikið fyrir Selfyssinga. Eyjavörnin small á lokakaflanum og sóknir Selfoss voru mjög ráðleysislegar.
Þær vínrauðu lentu á vegg og þegar ÍBV fékk byr í seglin á lokakaflanum var ljóst að ekkert myndi stöðva þær. ÍBV skoraði átta mörk gegn einu á rúmum ellefu mínútum og breytti stöðunni úr 29:24 í 30:32. Selfoss skoraði síðasta mark leiksins úr aukakasti þegar leiktíminn var liðinn.
Hrafnhildur Hanna Þrastardóttir var markahæst hjá Selfossi með 9/ 3 mörk og Perla Albertsdóttir skoraði 8. Katrín Ósk Magnúsdóttir varði 14 skot. Hjá ÍBV var Karólína Lárudóttir markahæst með 7 mörk og Telma Armado og Greta Kavailuskaite skoruðu 6. Erla Rós Sigmarsdóttir varði 12 skot í markinu.
Fylgst var með gangi mála á mbl.is