Gregg Popovich þjálfari San Antonio Spurs í NBA körfuboltadeildinni hefur verið útnefndur þjálfari ársins í deildinni. Þetta er í þriðja sinn sem Popovich hlýtur útnenfninguna og aðeins Pat Riley og Don Nelson hafa verið valdir bestir jafnoft og Popovich.
Popovich hlaut yfirgnæfandi kosningu í kjörinu. Hann fékk 380 atkvæði, en aðeins 59 greiddu öðrum þjálfurum atkvæði sitt. Íþróttafréttamenn sem fjalla um NBA deildina í Bandaríkjunum og Kanada hafa atkvæðisrétt í kjörinu.
Undir stjórn Popovich vann San Antonio 62 leiki í vetur í deildinni og tapaði aðeins 20. San Antonio leikur við Dallas Mawericks í fyrstu umferð úrslitakeppni NBA og vann fyrsta leik liðanna, 90:85.