Cleveland Cavaliers tapaði sínum fjórða leik á tímabilinu í NBA-deildinni í nótt þegar liðið heimsótti Toronto Raptors. Cleveland skoraði 99 stig en Toronto 103 stig.
Sú var tíðin að kanadísku liðin áttu erfitt með að fóta sig í NBA-körfuboltanum. Nú er öldin önnur því Toronto teflir fram mjög frambærilegu liði þennan veturinn og er á meðal efstu liða með 10 sigra í sextán leikjum.
Kyle Lowry skoraði 27 stig fyrir Toronto en LeBron James 24 fyrir Cleveland og smellti sér upp fyrir stórskyttuna Reggie Miller á listanum yfir stigahæstu menn sögunnar. James er nú átjándi á þeim lista NBA-deildarinnar og nálgast 26 þúsund stigin.
Úrslit:
Charlotte - Washington 101:87
Orlando - New York 100:91
Boston - Philadelphia 84:80
Detroit - Miami 104:81
Toronto - Cleveland 103:99
Houston - Memphis 93:102
Milwaukee - Sacramento 118:129
Minnesota - Atlanta 99:95
Oklahoma - Brooklyn 110:99
San Antonio - Dallas 88:83
Phoenix - New Orleans 114:120
LA Clippers - Utah 91:102