Carmen Tyson-Thomas slær ekki slöku við hjá nýliðum Njarðvíkur í Dominos-deild kvenna í körfubolta og skoraði 52 stig þegar liðið skellti Grindavík á útivelli í kvöld 86:70.
Njarðvíkingum var spáð neðsta sæti deildarinnar í vetur en nýliðarnir hafa blásið á slíkar hrákspár og hafa einfaldlega unnið þrjá af fyrstu fjórum leikjum sínum í deildinni.
Thomas skoraði 52 stig, tók 12 fráköst og gaf 7 stoðsendingar á samherja sína í kvöld. Ashley Grimes skoraði 34 stig fyrir Grindavík sem leikur þessa dagana án Ingibjargar Jakobsdóttur og Ingunnar Emblu Kristínardóttur sem eru meiddar.
Úrslit kvöldsins:
Grindavík - Njarðvík 70:86
Stjarnan - Valur 71:62
Haukar - Snæfell 42:69
Keflavík - Skallagrímur 81:70