Körfuboltamaðurinn Ragnar Nathaníelsson skoraði sex stig fyrir Albacete í 74:67 tapi gegn Navarra í spænsku C-deildinni í körfubolta í dag. Albacete er neðst í deildinni með sex sigra og 20 töp.
Ragnar hefur verið að skora 5,5 stig að meðaltali með Albacete í vetur og spilar hann rúmlega 17 mínútur í leik.
Eftir ágætisbyrjun í deildinni hefur liðið aðeins unnið einn leik af síðustu 11 leikjum sínum. Ragnar og félagar þurfa því að hrökkva í gang fyrr frekar en síðar, enda aðeins fjórir leikir eftir af tímabilinu og fall um deild möguleiki. Liðið er þremur stigum frá öruggu sæti í deildinni.