Snæfell og Keflavík hefja baráttu sína um Íslandsmeistaratitilinn í körfubolta kvenna þegar liðin mætast í Stykkishólmi klukkan 19.15 í kvöld.
Liðin urðu jöfn að stigum með 44 stig í deildarkeppninni í vetur og því allt útlit fyrir spennandi viðureign. Snæfell varð deildarmeistari þar sem liðið hafði betur í innbyrðisviðureignum sínum við Keflavík á tímabilinu.
Snæfell fór nokkuð örugglega áfram í úrslitin eftir 3:0-sigur sinn gegn Stjörnunni í undanúrslitum. Það var hins vegar meiri spenna í rimmu Keflavíkur gegn Skallagrími, en Keflavík tryggði sér sæti í úrslitaeinvíginu með sigri í oddaleik liðanna.
Leikur Snæfells og Keflavíkur í kvöld verður í beinni textalýsingu á mbl.is.
Nýjar fréttir kl. 11.50:
Leiknum hefur verið frestað vegna veðurs og hann leikinn á þriðjudagskvöld.