Domantas Sabonis, Litháinn hávaxni í liði Sacramento Kings, heldur áfram að leika vel fyrir liðið í NBA-deildinni í körfuknattleik.
Í nótt var hann með þrefalda tvennu í öruggum 123:89-sigri Sacramento á Toronto Raptors.
Er Sabonis sá leikmaður í NBA-deildinni sem er með flestar slíkar á yfirstandandi tímabili, 24 þrennur í 68 leikjum.
Sabonis, sem leikur í stöðu kraftframherja, skoraði 13 stig, tók 17 fráköst og gaf tíu stoðsendingar í nótt.
Miami vann nauman sigur á Cleveland Cavaliers, 107:104, þar sem Jimmy Butler fór fyrir Miami.
Butler skoraði 30 stig, gaf fimm stoðsendingar og stal boltanum fjórum sinnum.
Í liði Cleveland var Jarrett Allen með tröllatvennu þegar hann skoraði 25 stig og tók 20 fráköst.
Chet Holmgren átti stórleik í liði Oklahoma City Thunder þegar liðið lagði Utah Jazz að velli, 119:107.
Holmgren, sem er 21 árs, skoraði 35 stig, tók 14 fráköst, stal boltanum tvisvar og varði þrjú skot.
Shai Gilgeous-Alexander bætti við 31 stigi og sjö stoðsendingum.
Úrslit næturinnar:
Toronto – Sacramento 89:123
Cleveland – Miami 104:107
Oklahoma – Utah 119:107
Detroit – Indiana 103:122
Boston – Milwaukee 122:119
Golden State – Memphis 137:116
Phoenix – Philadelphia 115:102
Portland – LA Clippers 103:116