Vetur konungur er mættur - myndband

Það er nánast alveg sama hversu vindasamur, blautur eða kaldur dagur blasir við stírubólgnum augum landsmanna þegar þau gægjast út um gluggann sinn að morgni - hjá sjómönnum er alltaf hvassara og kaldara. 

Það kemur þó ekki í veg fyrir að menn haldi á miðin og hali inn það sem þjóðin þarf til að halda uppi merkjum sínum sem velferðarsamfélag. Eins fram kom í máli Trausta Egilssonar, skipstjóra til 50 ára, vinna sjómenn alla daga, alltaf. Má þá einu gilda hvort fyrsti snjór vetrarins fölvi dekkið eða Kári blási í trýnið á mönnum og undir svitastorkna hjálmana - þeir vinna samt. Og á sjónum er alltaf blautt, alltaf kalt og alltaf hvasst, því þeir róa á Íslandsmiðum.

Hollráð dagsins, nú þegar landsmenn böðlast við að komast upp Ártúnsbrekkuna með blauta fætur, á sumardekkjum sem virðast ekki ætla að hafa verkið af og harma þau örlög sín að þurfa að búa við svona svartamyrkur, kulda og slyddu, er því þetta: Horfðu á myndbandið sem fylgir þessari frétt (sem þessi maður tók), lestu ylvolgan Moggann með heitan kaffibolla í hönd, njóttu svo dagsins og þakkaðu fyrir að þessir menn standi vaktina í aðstæðum sem fæstir einfaldlega gætu, svo þú þurfir ekki að gera það. Því ef þeirra nyti ekki við væri öðruvísi umhorfs á Íslandinu góða.

 Sérstaklega er þó mælt með áhorfi frá og með mínútu 1:44.

• Blogga um frétt