„Sjómenn frá fjölskyldu sinni 210 daga ársins“

Sjómenn fá þúsund krónur dag til að greiða fyrir sitt fæði og fá milljón á mánuði fyrir að vera að heiman 210 daga ársins. 

Þetta segir Valmundur Valmundsson í nýlegri færslu á Facebook-síðu Sjómannasambands Íslands.

Í tengslum við frétt 200 mílna um laun sjómanna á Samherjaskipum hafa ýmsir lagt orð í belg og telja að ekki sé með þessu gefin hárrétt mynd af raunkjörum sjómanna. 

Þeirra á meðal er Guðmundur Ragnarsson, formaður Félags vélstjóra og málmtæknimanna.

Sjá frétt: Það eru ekki alltaf jólin á sjónum.

Nú hefur formaður Sjómannasambands Íslands bent á fleira sem til komi í þessu sambandi. Á Facebook-síðu félagsins vekur Valmundur athygli manna á því að kvótastaða Samherja sé með eindæmum góð, en útgerðir landsins séu þó nokkru fleiri en bara Samherji.

Valmundur segist ekki hafa „konkret tölur“, en sín ágiskun sé sú að sjómenn hafi að jafnaði um milljón á mánuði fyrir sína vinnu. Verði í því sambandi að horfa til þess að þeir séu frá fjölskyldu og vinum 210 daga ársins, eða um sjö mánuði af tólf. 

Enn fremur bendir hann á að sjómenn fái um 40.000 kr. vegna fatapeninga og starfsaldursálag fyrir þessa sjö mánuði og í heildina um þúsund krónur til að greiða matarkostnað sinn.

Í lok færslunnar bendir Valmundur á þessa frétt til að vekja athygli á samanburði starfskjara stéttanna tveggja.

• Blogga um frétt