Seiðasleppingar kalla á rannsókn og eru sagnfræði

Upplýsingar þess efnis að 160 þúsund laxaseiðum af norskum uppruna hafi verið sleppt í Tálknafjörð árið 2002 kalla á rannsóknir á erfðasamsetningu laxfiska í helstu ám landsins. Þetta segir Guðni Magnús Eiríksson, sem stýrir lax- og silungaveiðisviði hjá Fiskistofu, í samtali við Morgunblaðið.

Greint var frá sleppingum þessum á Stöð 2 í vikunni. Málavextir eru þeir að seiðin voru keypt í ágúst 2001 og til stóð að ala þau upp og setja í sjókvíar ári síðar. Þetta var á vegum Eyra-fiskeldis sem átti í samstarfi við norskt fyrirtæki, sem varð gjaldþrota áður en til sleppinganna kom. Með þroti norska fyrirtækisins fór verkefnið út um þúfur, ekki tókst að fá peninga til áframhaldandi starfsemi og Níels Ársælsson, forsvarsmaður Eyra-fiskeldis, hleypti því seiðunum fram í sjó úr kerum í stað þess að láta þau drepast þar. Þetta hefur Níels sagt hafa verið afarkost í þröngri stöðu.

„Að kanna málavöxtu nú er nánast sagnfræðilegt viðfangsefni,“ nefnir Guðni Magnús. Hann segir að nú verði farið yfir öll fyrirliggjandi gögn um starfsemi umrædds fyrirtækis og kallað eftir upplýsingum frá Níels Ársælssyni og öðrum eftir atvikum. Með tilliti til ákæru eða annars slíks sé mál þetta sennilega fyrnt, sem breyti ekki því að skýra þurfi málavöxtu og afleiðingar.