Kafbátur Þjóðverja að Skarfabakka

Það vakti töluverða athygli þegar þýski kafbáturinn U-36 kom til hafnar við Skarfabakka í Reykjavík í morgun. Kafbáturinn mun taka þátt í NATO-æfingu sem fer fram við Íslandsstrendur 29. júní til 10. júlí.

U-36 er af nýjustu gerð kafbáta, af gerðinni 212 sem hönnuð er af Howaldtswerke-Deutsche Werft AG fyrir þýska og ítalska sjóherinn. Kafbátar af þessari gerð eru 57 metra langir og 6,8 metra að breidd og búast má við að það sé þröngt um áhöfnina.

Tíu slíkir kafbátar hafa verið framleiddir og er gert ráð fyrir að 16 bætist við á næstu árum. Ekki er um að ræða ódýr tæki og kostar hver bátur kostar á bilinu 280 til 560 milljónir evra eftir því hvernig hann er búinn, jafnvirði 44 til 88 milljarða íslenskra króna.

U-36 er í fyrstu kafbátasveit þýska sjóhersins og er með heimahöfn í Eckernförde í Schleswig-Holstein.

Freigátur, kafbátar og flugvélar

Æfingunni Dynamic Mongoose er ætlað að þjálfa áhafnir herskipa og flugvéla í átökum við kafbáta og upplýsir utanríkisráðuneytið að „auk Íslands taka sex ríki Atlantshafsbandalagsins þátt í æfingunni; Bandaríkin, Bretland, Frakkland, Kanada, Noregur, Þýskaland, Bretland og Kanada. Þau leggja til fimm kafbáta, fimm freigátur og fimm kafbátaleitarflugvéla.“

Þá segir að „æfingar af þessu tagi hafa verið haldnar árlega undan ströndum Noregs frá árinu 2012 nema þegar hún fór fram hér á landi árið 2017. Ákveðið hefur verið að framvegis verði æfingarnar haldnar til skiptis á Íslandi og í Noregi. Íslendingar leggja til aðstöðu á öryggissvæðinu á Keflavíkurflugvelli og Landhelgisgæsla Íslands tekur þátt í æfingunni, m.a. með stjórnstöð á öryggissvæðinu auk þess sem varðskip og þyrlur munu taka þátt í þeim hluta æfingarinnar sem tengjast hefðbundnum verkefnum stofnunarinnar.“