Segir Íslendinga stefna að „makrílkrísu“
Setja bókamerki
Alls eiga íslensku uppsjávarskipin eftir að veiða rúmlega 86 þúsund tonn eða tæplega 60% af þeim makrílkvóta sem þau hafa vegna vertíðarinnar. Uppi eru áhyggjur um það hvort hægt verði að ná öllum þeim afla sem eftir stendur fyrir lok vertíðar, en íslensku skipin hafa þó út árið að veiða makrílkvóta sinn.
Sífellt minna hefur fundist af makríl í íslenskri lögsögu og vegna skorts á samkomulagi milli strandríkjanna um tilhögun veiðanna þurfa íslensku skipin að stunda sínar veiðar utan lögsögu annarra ríkja. Makrílveiðarnar hafa því aðallega farið fram í Smugunni en siglingin þangað af Austfjörðum, þar sem töluverð vinnsla makríls fer fram, er um 600 sjómílur.
Norska sjávarútvegsblaðið, Fiskeribladet, segir Íslendinga stefna að „makrílkrísu“ vegna stöðu veiðanna. Norðmenn hafa beitt því sem rök gegn kröfu Íslendinga um 16,5% hlutdeild í veiðunum að íslensk skip hafa ekki náð að veiða þann afla sem gert er tilkall til.
Á síðasta ári náðist ekki að veiða allan þann makríl sem heimild var fyrir og fengu útgerðir að færa allt að 15% heimildanna milli ára, en við það féllu 10 þúsund tonn niður. Samtök fyrirtækja í sjávarútvegi báðu um heimild til flutnings á 30% heimilda milli ára.
Systurskipin með aflamest
Systurskipin Börkur NK, sem Síldarvinnslan gerir út, og Vilhelm Þorsteinsson EA, sem gert er út af Samherja, hafa landað mestum makrílafla það sem af er makrílvertíð eða 10.577 tonn. Skipin tvö taka þó þátt í samstarfi fimm skipa ásamt Bjarna Ólafssyni AK, Beitis NK og Barða NK, en Síldarvinnslan gerir út þau skip.
Beitir og Barði NK hafa borið að landi þriðja og fjórða mesta makrílafla að landi og hafa skipin fimm sem taka þátt í samstarfinu alls landað 22.352 tonnum af makríl sem er rúmlega þriðjungur alls landaðs makrílafla.
Fimm dauðir hvolpar fundust í poka
Mál hjúkrunarfræðingsins fer aftur fyrir héraðsdóm
Þyngri refsing fyrir að nauðga stjúpdóttur æskuvinar
Þetta eru hjólaframkvæmdirnar sem unnið er að
Tveggja mánaða flandur um Nýja-Sjáland
Sennilega gróðureldur, ekki ný sprunga
Eru að vakta stöðuna í bólusetningum barna
Breytingar á skipulagi fréttadeildar RÚV