„Ég hef borið traust til hennar“
Setja bókamerki
Háskóla-, iðnaðar- og nýsköpunarráðherra, Áslaug Arna Sigurbjörnsdóttir, kveðst treysta því að Vinstri grænir taki máli matvælaráðherra alvarlega, í ljósi álits umboðsmanns Alþingis. Málið sé nú á þeirra borði.
Í samtali við blaðamann mbl.is að ríkisstjórnarfundi loknum segir Áslaug málið einstakt, spurð hvort vantraust ríki innan stjórnarsamstarfsflokkana og hvort samstarfinu sé stefnt í hættu.
„Þetta mál var auðvitað ansi einstakt því það er ekki í stjórnarsáttmála og samtalið og samráðið var ekki mikið, ef eitthvað. Þannig að bannið [gegn hvalveiðum] var auðvitað talsvert fyrirvaralaust og fól í sér mjög íþyngjandi ákvörðun eins og kemur síðan fram og var staðfest í áliti umboðsmanns,“ segir Áslaug.
„Við verðum auðvitað alltaf að gæta hófs í beitingum á íþyngjandi valdheimildum. En það eru ýmis verkefni fyrir höndum og við verðum að sjá hvernig Vinstri grænir ætla að taka á þessu máli.“
Á borði Vinstri grænna
Nú eru allar líkur á að vantrauststillaga verði lögð fram af flokkum stjórnarandstöðunnar á matvælaráðherra og er talsverð ólga innan þingsins. Má þá einnig álykta sem svo, út frá ummælum nafnlausra þingmanni í viðtali við Morgunblaðið í gær, að vantraust til ráðherra ríki einnig innan Sjálfstæðisflokksins. Telur þú svo vera?
„Þetta er auðvitað þungur áfellisdómur yfir þessu verklagi og ákvörðun hennar var ekki í samræmi við lög eins og þingflokkur Sjálfstæðisflokksins hafði bent á og varað strax við. Málið er nú á borði Vinstrihreyfingarinnar – græns framboðs og við tökum bara eitt skref í einu og það eru margir dagar í þingsetningu.“
Berð þú enn traust til ráðherra?
„Ég tel að málið sé alvarlegt og veit að Vinstri grænir taka það alvarlega og eru að skoða málið. En ég hef borið traust til hennar og samstarfsmanna minna í ríkisstjórn og átt við þau gott samstarf hingað til,“ segir Áslaug.
Breytingar á skipulagi fréttadeildar RÚV
Mál hjúkrunarfræðingsins fer aftur fyrir héraðsdóm
Þyngri refsing fyrir að nauðga stjúpdóttur æskuvinar
„Höfum ekki náð að skríða upp úr þeirri gryfju“
Frambjóðendur skila inn listum í Hörpu
Krefjast stöðvunar framkvæmda
Norskur lögreglumaður dæmdur
Telur forsendur fyrir vaxtalækkun