Rolls Royce hefur nú látið frá sér aðra mynd af Wraith, sem á að frumsýna eftir tæpan mánuð. Fyrir nokkrum vikum sýndum við ykkur fyrstu myndina af bílnum, sem á að verða kraftmesti Rolls Royce til þessa, og giskuðum þá á að eitthvað væri lítið til af lömpum í verksmiðjunni.
Ástandið virðist ekki hafa batnað mikið í þeirri deildinni, eins og meðfylgjandi mynd ber með sér. Þó vilja kollegar okkar hjá autoblog.com meina að myndin gefi til kynna að afturendinn verði svipaður, eða jafnvel eins, og á Ghost.
Wraith mun, samkvæmt framleiðanda, bera með sér þann lúxus og þægindi sem ætlast má til af Rolls Royce, en á sama tíma mun hann einkennast af afli, stíl og dramatík. Eins og við er að búast hljómar það aðeins betur á upprunalega tungumálinu.
Mikil leynd hefur hvílt yfir mótornum sem fer í bílinn, líkt og öðru sem honum tengist. Í fréttatilkynningu frá Rolls Royce kemur fram að áður fyrr hafi Rolls Royce aðeins gefið eitt út um hestaflafjölda í bílum sínum: „Nóg.“ Um aflið í Wraith megi hinsvegar segja að það sé „meira en nóg.“
Þá vitum við það.
Smelltu á þennan hlekk til að sjá stiklu Rolls Royce fyrir Wraith.