Skólaatriði Tortímandans endurskoðað

Von er á nýrri þáttaröð sem byggir á kvikmyndunum um Tortímandann (e. Terminator), sem fyrrum leikarinn og núverandi fylkisstjóri í Bandaríkjunum, Arnold Schwarzenegger, gerði frægan. Í einu atriði þáttanna lendir ungur drengur í árás í skólanum sínum og þykir það atriði ekki við hæfi eftir skólaárásina í Virgina Tech í apríl, þar sem 32 ungmenni létu lífið í skotárás skólafélaga þeirra. Þetta kemur fram á fréttavef BBC.

Þættirnir bera heitið Krónika Söru Connors og fjalla um móður sem reynir að vernda son sinn, sem mögulega er ætlað að bjarga heiminum. Samkvæmt handritinu var honum ætlað að lenda í skólaárás og segir framleiðandi þáttanna það vera mikilvægt atriði fyrir söguþráðinn. Það liggur þó fyrir að sögunni verður breytt.

Krónika Söru Connors, sem framleidd er af Fox sjónvarpsstöðinni, er ætlað að höfða til kvenna og hefjast sýningar á þættinum í Bandaríkjunum í byrjun næsta árs. Aðalleikkona þáttanna verður hin breska Lena Headey sem áður hefur sést í kvikmyndum á borð við þá um Bræðurna Grimm og Leik Ripleys.

• 1 blogg um fréttina

Bloggað um fréttina

• Árni Gunnar Ásgeirsson: Er ekki búið að drepa á alla vegu allstaðar?