Veröld/Fólk | 1 Fólk - fréttir | mbl | 2.8.2007 | 11:10

Brestir í sambandi Brads og Angelinu

Brad og Angelina mæta á frumsýningu í júní. AP

Alvarlegir brestir eru komnir í samband Brads Pitt og Angelinu Jolie, að því er fregnir herma. Segir sagan að þau hafi lent í heiftarlegu rifrildi nýlega um hver eigi að verða forsetaframbjóðandi Demókrataflokksins, en Brad styður Barack Obama en Angelina styður John Edwards.

Þau voru á ferðalagi í Frakklandi er uppúr sauð, og lauk sennunni með því að Angelina skvetti úr vínglasi yfir Brad, að því er tímaritið Life and Style Weekly hefur eftir heimildamanni. Jós Angelina að auki fúkyrðum yfir Brad.

„Brad stóð eftir með vínið lekandi af andlitnu, en rauk svo í burtu til að þvo sér og skipta um föt. Hann segir að sér hafi verið gjörsamlega nóg boðið af framkomu Angelinu,“ segir heimildamaðurinn.

Brad og Angelina fóru til Frakklands í þeim tilgangi að reyna að bjarga sambandinu. En sagan segir að eftir þetta rifrildi hafi þau sífellt verið að munnhöggvast.

Svo mun komið að þau eru farin að ræða hvort þeirra eigi að fá forræðið yfir börnum þeirra fjórum ef slitnar upp úr sambandinu.

Heimildamaður tjáði tímaritnu In Touch Weekly að rómantíkin sé horfin úr sambandinu, en þau reyni að láta ekki á neinu bera barnanna vegna. Börnin séu nú eina ástæðan fyrir því að þau séu enn saman.

Talið er að ef þau slíti samvistir muni Angelina fá forræðið yfir börnunum.