Lordi rændir í Bandaríkjunum

Finnska skrímslarokksveitin Lordi, sem sigraði í Eurovision söngvakeppninni fyrir tveimur árum komst í hann krappan í Kentucky í Bandaríkjunum, þar sem sveitin er nú á ferðalagi, vopnaðir ræningjar óku upp að hljómsveitarrútu þar sem Lordi og hópur áhangenda hennar höfðu safnast saman og ógnuðu hópnum með byssu.

Umboðsmaður sveitarinnar flýði á næsta bar og hringdi í lögregluna, sem kom of seint á vettvang því ræningjarnir voru á bak og burt.

Að sögn söngvara sveitarinnar var um að ræða hóp eiturlyfjafíkla sem þegar var leitað af lögreglu þar sem þeir höfðu stolið bifreið fyrr um kvöldið. Fíklunum hefur greinilega ekki þótt finnsku skrímslin meira ógnvekjandi en svo að þeir þóttu prýðileg fórnarlömb vopnaðs ráns.

Þjófarnir leika enn lausum hala, en engum sögum fer af hvað þeir höfðu upp úr krafsinu.

• 1 blogg um fréttina

Bloggað um fréttina

• Gísli Foster Hjartarson: Ekki láta útlitið blekkja!