Sekt vegna brjóstasýningar ógilt

Bandarískur áfrýjunardómstóll ógilti í dag 550 þúsund dala stjórnvaldssekt, sem bandaríska fjarskiptanefndin ákvað að sjónvarpsstöðin CBS Corp. skyldi greiða vegna óvæntrar brjóstasýningar söngkonunnar Janet Jackson í hálfleik Super Bowl, úrslitaleik bandarísku ruðningsdeildarinnar árið 2004. CBS sýndi beint frá leiknum og skemmtiatriðunum í hálfleik.

Áfrýjunardómstóllinn komst að þeirri niðurstöðu, að fjarskiptanefndin hefði farið offari og látið stjórnast af duttlungum þegar hún ákvað að CBS skyldi greiða sekt fyrir að sýna ósæmilegt sjónvarpsefni.

Talið er að um 90 milljónir manna, þar á meðal fjöldi barna, hafi fylgst með því þegar Justin Timberlake söng: „Þú verður nakin áður en þessu lagi lýkur.“ Hann þreif síðan í brjóstahlíf á búningi Jackson og í ljós kom brjóstið bert. Jackson og Timberlake sögðu á eftir að um hefði verið að ræða „búningabilun". 

Dómstóllinn komst að þeirri niðurstöðu, að fjarskiptanefndin hefði brugðið út af 30 ára hefð fyrir því að sekta því aðeins sjónvarpsstöðvar fyrir að sýna ósiðlegt sjónvarpsefni, að áhorfendur hafi komist verulega úr jafnvægi. Atriðið, sem þetta mál snérist um, hafi verið allt of stutt og lítilfjörlegt til að falla undir slíka skilgreiningu.

• 4 blogg um fréttina

Bloggað um fréttina

• Brynjar Jóhannsson: Ég vil lögsækja allar berbrjósta konur.
• Gísli Foster Hjartarson: Aðeins í henni Ameríku
• Steinn Hafliðason: Börnin koma með storkinum
• Gísli Tryggvason: Lögfræðin betri en brjóstvitið