París Hilton birti í gær sína eigin „auglýsingu“ á netinu í tilefni af því að í auglýsingu Johns McCains, forsetaframbjóðanda repúblíkana í Bandaríkjunum, var keppinauti hans, Barack Obama, líkt við París og Britneyju Spears og sagður innihaldsrýr fjölmiðlaímynd.
Í myndbandi sem birtist í gær situr París á sólstól, klædd engu nema sundbol og háhæluðum skóm og segist vera fræg, þó hún sé ekki „frá því í gamla daga“ og ekki gráhærð eins og „kallinn með hrukkurnar sem notaði mig í kosningaauglýsingunni sinni, sem ég býst við að þýði að ég sé í forsetaframboði.“
„Ég get fullvissað bandarísku þjóðina um að ég er sko alveg tilbúin í leiðtogahlutverkið,“ segir París, og fer svo að ræða stefnu sína í orkumálum.
Foreldrar Parísar gáfu fyrr á þessu ári 4.600 dollara í kosningasjóð McCains. Móðir hennar sagði að auglýsing McCains hefði verið „sóun á tíma og athygli þjóðarinnar“ á sama tíma og fjöldi manns væri að missa heimili sín og atvinnuna.