Obama til í „maður á mann“ við Palin

Barack Obama, forsetaframbjóðandi demókrata, er reiðubúinn að kljást við varaforsetaefni repúblikana, Söruh Palin, „maður á mann“ - þ.e. í körfubolta.

Obama, sem nýtur hvert tækifæri sem gefst til að spila körfubolta á milli kosningafunda, segist hins vegar ekki vera reiðubúinn að keppa við Palin í skotfimi, en hún er þaulvanur veiðimaður.

„Hún lítur út fyrir að geta eitthvað; hún spilaði í framhaldsskóla,“ sagði Obama um körfuboltahæfileika Palins, er hann var gestur í þættinum This Week, sem er sýndur á bandarísku sjónvarpsstöðinni ABC.

„Ég veit að hún er góð skytta, og ég veit að ég myndi að öllum líkindum ekki fara með henni á skotsvæðið til að æfa skotfimina,“ sagði Obama og bætti við: „Ég held að hún sé betri skytta en ég. En ég held að ég ætti góðan möguleika á körfuboltavellinum hins vegar.“

Þess má geta að Palin fékk viðurnefnið „Sarah Barracuda“ í framhaldsskóla vegna frammistöðu sinnar með körfuboltaliði skólans.

Sarah Palin þykir vera góð skytta, þ.e. með byssu, en hún æfði líka körfubolta, og var kölluð „Sarah Barracuda“ vegna frammistöðu sinnar. Spurning hvort Obama eigi í hættu að vera étinn á vellinum? Reuters

• 1 blogg um fréttina

Bloggað um fréttina

• Matthias Freyr Matthiasson: Mbl að standa sig í að segja frá.....