Talið er að andlitsmynd eftir listmálarann Francis Bacon seljist á 7,5 milljónir punda, rúmlega 1,3 milljarða króna þegar hún verður boðin upp hjá Christie's í Lundúnum þann 19. október næstkomandi. Verkið, sem er frá árinu 1969 er af Henriettu Moraes sem er ein fárra kvenna sem Bacon málaði.
Pilar Ordovas, hjá Christie's í Lundúnum, segir í samtali við BBC að verkið sé dásamlegt og veiti stórkostlega sýn inn í líf þeirra sem lifðu og hrærðust í Soho hverfinu í Lundúnum á sjöunda áratugnum. Ordovas þekkti vel lífið í Soho en hún var náin vinur og drykkjufélagi Bacon í Soho á sjötta áratugnum, áður en hann varð jafn frægur og síðar varð.
Fyrirsætan, Moraes, lést árið 1998 en hún sat fyrir hjá fleiri málurum, þar á meðal Lucian Freud. Verkið sem nú verður selt hefur verið í eigu Garech Browne, eins af eigendum Guinness brugghússins, síðan á áttunda áratugnum en hann var þekktur velunnari listamanna.
Í maí sl. var verk Bacon's Triptych selt á 86,3 milljónir Bandaríkjadala, tæplega 8,3 milljarða króna, á uppboði í New York og er það hæsta verð sem hefur fengist fyrir verk Bacons sem lést árið 1992.