Lét bíða eftir sér fram yfir prófkjör

Það er óhætt að segja að nýafstaðið prófkjör Samfylkingarinnar í Reykjavík verði Skúla Helgasyni eftirminnilegt, en auk þess að hafna í fimmta sæti í prófkjörinu fæddist honum og eiginkonunni, Önnu Lind Pétursdóttur, sonur aðfaranótt sunnudags. „Þetta var viðburðaríkur sólarhringur,“ segir Skúli sem fyrir á þrjá drengi.

Drengurinn, sem kom í heiminn á þriðja tímanum í fyrrinótt, lét bíða eftir sér í viku.

„Ég hafði frekar reiknað með honum fyrri part vikunnar, en reyndar var mamma hans búin að segja að hún stefndi eindregið að því að leyfa mér að ljúka prófkjörinu áður en drengurinn kæmi. Það stóð heima þó að naumt væri,“ segir Skúli Helgason.