Sænska poppsveitin Abba og bresku proggrokkararnir í Genesis eru á meðal þeirra sem hafa verið teknir inn í Frægðarhöll rokksins í Bandaríkjunum.
The Stooges, Jimmy Cliff og The Hollies eru einnig á meðal þeirra sem eru þessa heiðurs aðnjótandi, en listamennirnir verða teknir inn með formlegum hætti við hátíðlega athöfn í New York 15. mars nk.
Fjölmargir komu til greina í ár. M.a. bandarísku fönkrokkararnir í Red Hot Chili Peppers og glysrokkararnir í Kiss.
Það þykir harla ólíklegt að Abba, sem lagði upp laupana árið 1983, muni taka lagið á hátíðinni, að því er fram kemur á vef breska útvarpsins.