Conrad Murray, læknirinn sem sakaður er um að hafa gefið poppsöngvaranum Michael Jackson öflugt deyfilyf sem á endanum varð honum að bana, veitti ungri konu læknishjálp um borð í flugvél US Airways í gær.
Konan missti meðvitund meðan flugvélin var á ferð, Áhöfn vélarinnar lýsti eftir lækni og Murray gaf sig fram. Konan var með mjög daufan púls en Murray gaf henni lyf í æð og notaði til þess búnað sem var í vélinni. Flugvélin var að koma frá Houston í Texas og átti að fara til Phoenix í Arisona en hún lenti í Albuquerque í Nýju-Mexíkó þar sem konan var flutt á sjúkrahús. Hún var á ferð með 11 mánaða gamalt barn sitt.
„Þetta kemur okkur ekki á óvart," sagði Miranda Sevcik, einn af lögmönnum Murrays. „Hann er góður læknir og góður læknir bjargar fólki."
Murray var á leið til Los Angeles til fundar við lögmenn sína en hann hefur verið ákærður fyrir manndráp af gáleysi. Hann starfaði sem líflæknir Jacksons og viðurkenndi fyrir lögreglu, að hafa gefið söngvaranum deyfilyfið
propofol svo Jackson gæti sofið.