BBC hafnaði Já, ráðherra

Breska ríkissjónvarpinu, BBC bauðst að taka til sýningar nýja syrpu af gamanþáttunum Já, ráðherra, sem sýndir voru við miklar vinsældir hér á landi fyrir allnokkrum árum.  BBC bað um að framleiddur yrði prufuþáttur áður en ákveðið yrði að panta heila þáttaröð, höfundarnir sáu sér það ekki fært og því verða þættirnir ekki sýndir á BBC, heldur á sjónvarpsstöðinni Gold. Sýningar hefjast eftir nokkrar vikur.

Ástæða þess að höfundar þáttanna neituðu að framleiða prufuþátt var að þættirnir höfðu áður verið framleiddir og notið gríðarlegra vinsælda. „Það eru til 38 prufuþættir á DVD,“ segir Jonathan Lynn, annar höfundanna, í viðtali við BBC.

Fyrsti þátturinn af Já, ráðherra var sýndur árið 1980. Síðan var framleidd önnur þáttaröð sem hét Já, forsætisráðherra með sömu persónum og leikendum. 

Paul Eddington og Nigel Hawthorne, sem léku ráðherrann, síðar forsætisráðherrann Jim Hacker og ráðuneytisstjórann Humphrey Appleby, eru báðir látnir.

Við hlutverki ráðherrans tekur David Haig og ráðuneytisstjórinn verður leikinn af Henry Goodman, en báðir hafa þeir leikið þessi hlutverk í leikriti sem byggt er á þáttunum.

• 1 blogg um fréttina

Bloggað um fréttina

• Hinn Íturvaxni: Tengd frétt.