Perlukjóllinn sem leikkonan Lupita Nyong'o klæddist á Óskarsverðlaunahátíðinni vakti mikla athygli þegar sá orðrómur komst á kreik að perlurnar sem þöktu hann væru ekta og verðmæti kjólsins væri um 20 milljónir króna. Þegar kjólnum var svo stolið af hótelherbergi leikkonunnar var fólki brugðið. Stuttu seinna kom í ljós að kjóllinn var alls ekki eins verðmætur og upphaflega var haldið fram og kom hann þá aftur í leitirnar. Þáttastjórnandinn Piers Morgan er ljóslega ekki sá sem stal kjólnum því hann kveðst hafa vitað frá upphafi að um gerviperlur væri að ræða.
Morgan hitti Lupitu Nyong'o á verðlaunahátíðinni og sá þá að kjóllinn var ekki þakinn ekta perlum. „Ég hitti hana þetta kvöld og sá að þetta voru ekki ekta perlur, en ég vildi ekki skemma töfrana. Ekta perlur eða ekki, hún var glæsileg.
Ég er sleginn, algjörlega sleginn, yfir því að komast að því að eitthvað í Hollywood er ekki raunverulegt,“ sagði Morgan kaldhæðnislega við blaðamann TMZ. Að lokum sagði hann þá að þjófarnir væru aular að halda að þeir hefðu dottið í lukkupottinn þegar þeir stálu kjólnum fræga.
Skilaði kjólnum sem reyndist verðlítill